जन्म : 28 जुलै 1949ला एका सुदूर खेड्यात. शिक्षण : एम. ए. (इंग्रजी), बी. एड.

आठवीत असताना बालवीर चळवळीत राष्ट्रपती पदकाने सन्मानित. प्रारंभीच्या महाविद्यालयीन जीवनात बालवीरांच्या कॅनडा-अमेरिकेतील जागतिक मेळाव्यात सहभाग आणि याचवेळी दहा देशांचा प्रवास. शाळेत असल्यापासून सर्जनशील लेखनास सुरुवात. सहावीत असताना डायरी लिहिली. हे पहिलं-वहिलं लिखाण अलीकडं 2001 मध्ये प्रकाशित.1975 मध्ये पत्नी सौ. आशा सोबत धारा व नंतर साकेत प्रकाशनाची स्थापना. आतापर्यंत 1500 पुस्तके प्रकाशित केली आहेत. राष्ट्रीय साक्षरता मिशनमध्ये नवसाक्षरांसाठी पुस्तके लिहून आणि प्रकाशित करून सहभाग. नवसाक्षरांसाठी `शब्दसंगत’, मुलांसाठी `साकेत सवंगडी’ नियतकालिकांचे दीर्घकाल संपादन, प्रकाशन. सुरुवातीपासून लेखन प्रकाशनाचे काम. अल्पकाळ अध्यापन.बाबा भांड यांच्या आतापर्यंत नऊ कादंबऱ्या, आठ चरित्र, दोन कथासंग्रह, पाच प्रवासवर्णने, सहा ललित गद्य, पाच आरोग्य व योग, चार संपादित, आठ संशोधन-इतिहास, चार बालकथा, अकरा बालकादंबरी, तीन एकांकिका, अकरा किशोर कादंबऱ्या, चौदा किशोर कथा, अनुवादित पाच बालकथा, आणि बत्तीस नवसाक्षरांसाठी पुस्तके अशी विविध पुस्तके प्रकाशित.

महाराष्ट्र शासनाचे उत्कृष्ट साहित्यनिर्मितीचे अकरा पुरस्कार, साहित्य अकादमी बालसाहित्य पुरस्कार, महाराष्ट्र फाऊंडेशन, भैरुरतन दमाणी, नरहर कुरुंदकर, सांगाती अकादमी, इचलकरंजीकर ट्रस्ट, म.सा.प. पुणे, दाते कादंबरी वर्धा, साहित्य संमेलन, बालसाहित्याचा राष्ट्रीय असे विविध पुरस्कार. साहित्याचा हिंदी, इंग्रजी, कानडी, गुजरातीत अनुवाद.महाराष्ट्र शासनाचा 2009 चा श्री. पु. भागवत उत्कृष्ट प्रकाशक पुरस्कार साकेत प्रकाशनास.

मराठी नववी पाठ्यपुस्तकात पाठ, मुक्त विद्यापीठ नाशिक धर्मा, इतर विद्यापीठांत दशक्रिया, काजोळ, सादाको, कोसलाबद्दल अभ्यासक्रमात. पुणे विद्यापीठ, अमरावती विद्यापीठ, डॉ. बाबासाहेब आंबेडकर मराठवाडा विद्यापीठात सहा विद्यार्थ्यांची भांड यांच्या साहित्यावर पीएच.डी. सहा विद्यार्थ्यांनी दशक्रिया, तंट्या, योगी वर एम.फिल केले.प्रकाशनाशिवाय जन्मगावी ग्रामविकासाअंतर्गत पाणलोट क्षेत्र विकास, छत्रपती शाहू वाचनालय, खेड्यातील गरीब शेतमजुरांच्या अपंग-मूकबधिर मुलांसाठी निवासी शाळा, काहीकाळ वृद्धाश्रम, शरीर व मनस्वास्थ्यासाठी योगसाधना संस्थेत विश्र्वस्त. मराठी बालकुमार साहित्य संमेलन आयोजनात सहभाग. अ. भा. जगद्‌गुरू तुकोबाराय साहित्य परिषदेच्या 9व्या अ. भा. मराठा साहित्य संमेलनाचे अध्यक्ष. आता सर्व संस्थात्मक कामातून स्वेच्छा निवृत्ती आणि पूर्णवेळ वाचन, लेखन, प्रकाशनासह शेती, छायाचित्रण छंद. जगातील पंच्याहत्तरहून अधिक देशांचा प्रवास. 

महाराष्ट्र राज्य साहित्य आणि संस्कृती मंडळाचे माजी अध्यक्ष, महाराजा सयाजीराव गायकवाड चरित्र साधने प्रकाशन समिती, महाराष्ट्र शासन यांचे सचिव. महाराजा सयाजीराव गायकवाड संशोधन व प्रशिक्षण संस्थेचे सचिव.